బుల్లితెరసినిమా
Trending

కార్తీకదీపం 956 ఎపిసోడ్‌ హైలైట్స్..

బుల్లితెర ప్రేక్షకుల్ని ఎంతగానో ఆకట్టుకుంటున్న ‘కార్తీకదీపం’ సీరియల్.. 956 ఎపిసోడ్‌కి ఎంటర్ అయ్యింది.

‘దీపా నీ కాపురం నిలబడినట్లే కదా..’ అంటాడు మురళీ కృష్ణ సంబరంగా. ‘అదంతా నేను చూసుకుంటాను నాన్నా.. అలాంటి వ్యక్తిత్వం కలిగిన ఆ మనిషితో కలిసి బతకడానికైనా నేను మరింత కష్టపడతాను నాన్నా.. కలిసిపోతాం నాన్నా.. అందరం కలిసిపోతాం.. ’ అంటుంది దీప. దాంతో హిమ సంతోషంగా..‘అమ్మా నిజంగానే.. మనం నాన్న దగ్గరకు వెళ్లిపోతామా?’ అంటుంది. ‘మనం వెళ్లడం ఏంటమ్మా.. నాన్నే పడవలాంటి కారేసుకొచ్చి.. ఈ గట్టు నుంచి ఆ గట్టుకు చేర్చి మన బతుకుల్ని గట్టెక్కిస్తాడు.. ఇంతకాలం అంత నమ్మకం లేదు. ఇవాళే వచ్చింది.. మా ఆయన బంగారం.. బంగారం’ అంటూ హిమని గుండెలకు హత్తుకుంటుంది దీప.

కార్తీక్ మోనిత ఇంటికి వెళ్లాడు. కింద అన్ని వస్తువులు చల్లాచెదురుగా పడేసిన మోనిత ఓ పక్కకు కూర్చుని ఆలోచిస్తూ ఉంటుంది. కార్తీక్ అవన్నీ చూసుకుంటూ మోనితదగ్గరకు వెళ్లి.. ‘మోనితా..మోనితా’ అని పిలవగానే.. ‘నాకు తెలుసు కార్తీక్.. ఇలాంటి రోజు ఒకటి వస్తుంది నాకు ముందే తెలుసు..’ అంటూ రెచ్చిపోతుంది. కార్తీక్‌కి ఏం అర్థం కాదు. ‘అరే.. నీకోసం.. నిన్ను హిమని కలపడం కోసం నేను ఎంత తాపత్రయపడుతున్నానో తెలిసి.. నువ్వు ఇంకా ఆ దీపనే కలుస్తున్నావ్ చూడు.. అసలే ఆ దీప నా మీద కుట్రలు నిందలు వేయడానికి ట్రై చేస్తోంది. అంతెందుకు.. పది సంవత్సరాల క్రితం నీకు హిమకి జరిగిన యాక్సిడెంట్ కూడా నేనే చేయించానని అబద్దం చెప్పి నన్ను నీ ముందు నిలబెట్టి దాన్ని నువ్వు నమ్మేలా చేస్తుంది.. ఇది పక్కా.. అంత పక్కా ప్రణాళికతో ఉంది ఆ దీప..’ అంటూ అరుస్తుంది మోనిత.

‘అసలు నాకో సంగతి చెప్పు.. ఆ విహారీ గాడి సంగతి మరిచిపోయి అందరూ కలిసి ఉంటారా? చెప్పు.. నీ మీద పిచ్చి ప్రేమతో.. నేను పిచ్చిదానిలా ఉంది. ఇవన్నీ ఎందుకు నన్ను అమెరికా వెళ్లిపోమంటావా? మాట్లాడుకు కార్తీక్’ అని అరుస్తూనే ఉంటుంది. ‘ఇక ఆపుతావా? ఇందాకటి నుంచి చూస్తున్నాను.. నాకు మాట్లాడే ఛాన్స్ ఇస్తున్నావా అసలు? నేను నిన్ను దోషిగా కాదు.. నువ్వే నన్ను దోషిలా నిలబెట్టి మాట్లాడుతున్నావ్.. అరే నేను అర్దమయ్యేలా క్లారిటీగా చెప్పినా ఎందుకు అలా అపార్థం చేసుకుంటావ్? నాకు హిమ అంటే ఇష్టమని నీకు తెలుసు.. ఏదో వాళ్ల అమ్మ ఫోన్ చేసి కలవమంటే వెళ్లాను.. అక్కడికి వెళ్లాక తెలిసింది.. దీప హిమ బర్త్‌డే సెలబ్రేట్ చేస్తోందని. హిమ కోసం తను అలా చేసిందని తెలిసి.. కాస్త ఎమోషనల్ అయ్యాను.. అంతే.. దానికే నేను ఏదో తనతో కలిసిపోయినట్లు మాట్లాడతావేంటీ? అది నాకు నచ్చడం లేదు.. నీ చేతకాని తనాన్ని, అసమర్థతనాన్ని ఇలా చూపించకు.. కావాలంటే నేను చెప్పిన పని చేసి అప్పుడు నిరూపించు..’ అంటూ కార్తీక్ అరుస్తాడు.

‘ఏంటీ నాది చేతకాని తనమా? నాది కాదు.. నీదే చేతకాని తనం.. ముమ్మటికీ నీది చేతకాని తనమే.. ఆ విహారీ గాడి సంగతిని నేను వదిలేశాను.. అది నీ కళ్లతో నువ్వే చూశావ్.. ప్రపంచంలో ఆ విహారీగాడు ఒక్కడేనా రాసేది. కవితలంటే ఎంత ఇష్టమున్నా వాడితో అలా ఆ దీప రాసుకుని పూసుకుని తిరగాలా.. నాకు డాన్స్ అంటే ఇష్టం.. అలా అని నేను ప్రభుదేవ్‌తో సెట్ప్ వేస్తానా.. లేదుగా? నిరూపించుకోవాలంటే నిరూపించుకోవాలట.. సిగ్గు లేకపోతే సరి..’ అని గట్టిగా అరుస్తుంది మోనిత. ఇంతలో ప్రియమణి రావడంతో.. ‘ఏయ్ కాఫీ తీసుకుని రావే’ అంటుంది. ఇంతలోనే కార్తీక్ మనసులో మోనిత మాటలే మళ్లీ మళ్లీ వినిపిస్తూ ఉంటాయి.

కార్తీక్ అలా కోపంగా నిలబడి ఉండిపోవడం చూసిన మోనిత.. ‘అది కాదు కార్తీక్.. నువ్వు బాగుండాలని కోరుకునే నన్ను కాదని.. నువ్వు బాధపడాలని కోరుకునే వాళ్లకి ప్రాధాన్యత ఇవ్వద్దని చెబుతున్నాను కార్తీక్.. నన్ను చాలా మంది ప్రేమించారు కార్తీక్. పెళ్లి కూడా చేసుకుంటాం అన్నారు. దేవతలా చూసుకుంటాం అన్నారు.. కానీ వాళ్లందరినీ కాదని నిన్నే నా దేవుడిలా కొలుస్తూ ఉన్నాను. అయినా నువ్వు నన్ను అర్థం చేసుకోవట్లేదు.. అదే నా బాధ..’ అంటుంది మోనిత.

మేడపై రెండు మంచాలు వేసుకుని.. దీప హిమకి భోజనం తినిపిస్తూ ఉంటుంది. ఇద్దరూ సౌర్య గురించి, కార్తీక్ గురించి మాట్లాడుకుంటూ ఉంటారు. సీన్ కట్ చేస్తే సౌర్య కార్తీక్ రూమ్‌లో దుప్పట్లు కప్పుకుని వణుకుతూ పడుకుంటుంది. కార్తీక్ వచ్చి.. ‘ఏం అయ్యింది?’ అనగానే.. ‘చూడు నాన్నా.. ఈ రిమోట్.. ఏసీ ఎంత తగ్గించినా చలి ఎక్కువగానే వస్తోంది’ అనడంతో.. కార్తీక్ చూసి నవ్వుతూ.. ‘ఏసీ తగ్గాలంటే రిమోట్‌లో నంబర్స్ పెంచాలి..’ అంటాడు. ‘అయినా మీ ఇంట్లో ఏసీ ఉంది కదే.. నాన్నమ్మ కొనిందిగా?’ అంటాడు కార్తీక్. దాంతో సౌర్య.. ‘అది హిమ ఉన్నంత కాలమే వాడుకునేది నాన్నా.. అప్పుడు కూడా ఇలాగే చలిగా ఉండేది. నేను అమ్మ చీరలు కప్పుకునేవాళ్లం.. ఇక్కడిలా అక్కడ దుప్పట్లు ఉండవు కదా..’ అనగానే కార్తీక్ మనసులో దీప, సౌర్యల పేదరికం గురించి బాధపడతాడు.

అయితే సౌర్య ‘నాన్న మేడపై నిద్రపోదామా? చాలా బాగుంటుంది.. ఆకాశంలో నక్షత్రాలు చూస్తూ పడుకోవచ్చు.. ఈ ఏసీ కంటే బాగుంటుంది’ అంటుంది సంతోషంగా. దాంతో కార్తీక్ సరేనంటాడు. ఇద్దరూ పైకి వెళ్లి పక్క ఆర్చుకుంటారు. అదే సమయానికి మోనిత తన మేడపైన అటూ ఇటూ తిరుగుతూ.. కార్తీక్ గురించి తెగ ఆలోచిస్తూ ఉంటుంది. తను అన్న మాటలన్నీ తలుచుకుంటూ ఉంటుంది. ‘అసలు కార్తీక్ నావైపు వస్తాడా? ఆ దీప వైపు వెళ్లిపోతాడు..? లేదు దీప అంటే ఆ కార్తీక్‌కి ఇష్టమే లేదు.. నాతోనే ఉంటాడు.. ఎస్ నాతోనే ఉంటాడు’ అని తనలో తనే మురిసిపోతుంది.

కార్తీక్.. సౌర్యలు.. మేడపైన పడుకుని ఉండగా.. సౌర్య ‘నాన్న నక్షత్రాలు కనిపించనే కనిపించట్లేదు.. మా బలబద్రాపురంలో అయితే.. చాలా నక్షత్రాలు కనిపించేవి’ అనడంతో.. కార్తీక్.. ‘పల్లెటూరుల్లో అయితే కాలుష్యం ఉండదు.. సిటీలో అయితే అర్దరాత్రి వరకూ ట్రాఫిక్ ఉంటూనే ఉంటుంది కదా.. ఫ్యాకరీల పొగ.. అన్నీ కలిసి.. నక్షత్రాలు సరిగా కనిపించవు’ అంటాడు. వెంటనే ‘కాలుష్యం అంటే ఏంటి నాన్నా’ అంటుంది. ‘అంటే ఆకాశానికి భూమికి మధ్య ఉండేది..’ అంటాడు కార్తీక్.

‘అదిపోతే..?’ అని అడుగుతుంది. ‘ఆకాశం నిర్మలంగా స్వచ్ఛంగా కనిపిస్తోంది..’ అని బదులిస్తాడు కార్తీక్. ‘ఆకాశానికి భూమికి మధ్య కాలుష్యం ఉన్నట్టే.. నీకు అమ్మకి మధ్య అలాంటిదేదో ఉంది కదా నాన్నా..?’ అంటుంది సౌర్య. కార్తీక్ షాక్ అవుతాడు. సౌర్య మళ్లీ కార్తీక్‌వైపు చూస్తూ.. ‘అంత మంచి అమ్మ మీద కోపం ఎందుకు వచ్చింది నాన్నా? అదేదో కాలుష్యం లాగే పోతే.. అమ్మ కూడా ఆకాశం లాగే మీరు అన్నట్లుగా నిర్మలంగా స్వచ్ఛంగా కనిపిస్తుందేమో’ అంటుంది. వెంటనే కార్తీక్ కోపంగా.. ‘నీ వయసెంతే.. ఇంత పెద్ద పెద్ద మాటలు మాట్లాడుతున్నావ్?’ అంటాడు. ‘పెద్ద పెద్ద మాటలు కాదు నాన్నా.. పెద్దవాళ్ల మాటలు.. ఇప్పుడు మీరే కదా కాలుష్యం గురించి చెప్పింది. అదే కదా నేను చెప్పింది?’ అంటుంది సౌర్య ఎమోషనల్‌గా.

వెంటనే కార్తీక్ సైలెంట్ అవుతాడు. ‘ఒకటి అడగనా?’ అంటుంది సౌర్య. కార్తీక్ ఊ అంటాడు. ‘నీకు ఇప్పుడు అమ్మ అంటే కోపం కదా నాన్నా.. కానీ అమ్మ అంటే ఇష్టం ఎప్పుడో ఒకప్పుడు ఉండేది కదా.. అప్పుడు ఎలా ఉండేది?’ అని అడగగానే కార్తీక్ గతంలోకి వెళ్తాడు. ‘చెప్పండి నాన్నా మీతో ప్రేమగా ఉండేదా? సరదాగా మాట్లాడేదా? మిమ్మల్ని బాగా చూసుకునేదా.. తనే భోజనం టిఫిన్ ఒడ్డించేదా?’ అనగానే.. అన్నింటికి ఊ, హా.. అంటూ బదులిచ్చిన కార్తీక్.. ‘ఒకసారి ఉప్మా కూడా వడ్డించిది రాక్షసి.. మా అమ్మ ముందు కక్కలేక మింగలేక తినాల్సి వచ్చింది రాక్షసి..’ అంటాడు. దాంతో సౌర్య పెద్దగా నవ్వుతుంది.

‘మీ అమ్మ మంచిదే.. కానీ..’అంటూ సౌర్య వైపు చూస్తాడు కార్తీక్. ‘హా.. కానీ..’ అంటూ సౌర్య కార్తీక్ మాటలకోసం ఎదురు చూస్తుంటే.. ‘ఏం లేదులే’ అంటాడు కార్తీక్. ‘అంత మంచి అమ్మ మీద కోపం ఎందుకు వచ్చింది నాన్నా’ అని సౌర్య చాలా బాధగా అడగడంతో.. ‘కాలుష్యం..’ అని సమాధానం ఇస్తాడు కార్తీక్. ‘పడుకో.. పడుకో’ అంటాడు సౌర్యని కార్తీక్. కాసేపటికి ఇద్దరూ నిద్రపోతారు. దీప, హిమ కూడా మేడపై పడుకుంటారు. ఆకాశంలో నక్షత్రాలు లెక్కిస్తూ.. కార్తీక్ గురించి మాట్లాడుకుంటూ ఉంటారు.

సౌర్య నిద్రలో కార్తీక్ గుండెలపై చేయి వేయడంతో కార్తీక్ హిమా అంటూ కళ్లు తెరుస్తాడు. కానీ చేయి వేసింది సౌర్య అని చూసి.. చేయి తీసి పక్కకు జరిపే ప్రయత్నం చెయ్యడంతో సౌర్యకు మెలుకువ వస్తుంది. ‘ఏ నాన్నా నేను చేయి వేసుకోకూడదా?’ అని జాలిగా అడుగుతుంది సౌర్య. కార్తీక్ షాక్ అవుతాడు. అలానే ఆగిపోతాడు.. మరిన్ని వివరాలు తరువాయి భాగంలో చూద్దాం! ‘కార్తీకదీపం’ కొనసాగుతోంది.

Watch Telugu Full Movies Streaming Online on OTT Platforms

Related Articles

Leave a Reply

Your email address will not be published. Required fields are marked *

Back to top button